Kur një kandidat kërkon besimin e qytetarëve për të përfaqësuar popullin në Kuvend, ai duhet të jetë i gatshëm t’u përgjigjet pyetjeve publike për veprimtarinë e tij biznesore dhe raportimet që e kanë shoqëruar ndër vite.
Emri i Ejup Ahmetit është përmendur në një sërë raportimesh mediale që janë shqetësuese dhe serioze për mënyrën e funksionimit të bizneseve të lidhura me të. Sipas raportimeve të JOQ Albania dhe mediave të tjera shqiptare, Agjencia për Zhvillim Bujqësor dhe Rural në Shqipëri ka kërkuar kthimin e rreth 1.5 milionë eurove të përfituara përmes skemës IPARD, pas gjetjeve të raportuara nga OLAF lidhur me përdorimin e fondeve europiane. Vetë fakti që një shumë e tillë është objekt padie dhe kërkese për rikthim ngre pikëpyetje serioze për përgjegjësinë dhe transparencën e menaxhimit të këtyre fondeve. (burimi: https://joq-albania.com/artikull/1349952.html)
Në Kosovë, kompania Doni Fruits, e lidhur publikisht me Ejup Ahmetin, u përball me refuzimin e importit të mbi 23 tonëve qepë nga Serbia nga Agjencia e Ushqimit dhe Veterinarisë. Sipas dokumenteve të publikuara në media, autoritetet konstatuan mospërputhje në dokumentacion dhe në kontrollin fitosanitar, duke urdhëruar kthimin e mallit në vendin e origjinës. Për qytetarët lind pyetja e thjeshtë: si mund të kërkohet besimi për të përfaqësuar interesin publik kur një kompani e lidhur me kandidatin përballet me raste të tilla? (burimi:https://jepize.com/kompania-e-deputetit-te-levizjes-vetevendosje-ejup-ahemtit-tentoi-ti-fuste-23-tone-qepe-nga-serbia-qe-perbenin-rrezik-per-shendetin-e-qytetareve-auv-i-ndaloi/)
Po ashtu, opinioni publik është njohur edhe me aksionet e organeve të rendit lidhur me mjaltin e kontrabanduar dhe produktet ushqimore të dyshuara si të dëmshme për shëndetin. Edhe pse përgjegjësitë individuale përcaktohen nga institucionet kompetente, fakti që këto raste janë bërë objekt hetimesh, arrestimesh dhe konfiskimesh meriton sqarim të plotë para qytetarëve. (burimet:
https://www.dukagjini.com/arrestohen-5-persona-futen-ne-treg-mjalte-me-substanca-te-demshme-per-shendetin/; https://zeri.info/kronika/514048/arrestohen-dy-persona-ne-ferizaj-iu-gjeten-5800-kg-mjalte-te-kontrabanduar/)
Qytetarët nuk kanë nevojë për propagandë, por për përgjigje. Nuk mjafton të pozohesh pranë pushtetit apo të paraqitesh si sukses biznesor. Transparenca, integriteti dhe llogaridhënia janë kushtet minimale për këdo që kërkon votën e popullit.
Prandaj, para se të kërkojë mbështetje elektorale, Ejup Ahmeti duhet t’u përgjigjet qartë qytetarëve për secilin nga këto raste. Sepse vota nuk është shpërblim për afërsinë me pushtetin, por besim që fitohet me përgjegjësi dhe pastërti morale.
