“Në rast se anëtari i Qeverisë në detyrë zgjidhet deputet i Kuvendit të Republikës së Kosovës, i njëjti duhet të jap dorëheqje nga posti i anëtarit të Qeverisë para ditës së certifikimit të rezultatit të zgjedhjeve”.
Kështu thuhet në nenin 26 të Ligjit për Qeverinë e Kosovës (Nr. 08/L-117) i miratuar në vitin 2022 nga Kuvendi i Kosovës, shkruan Demokracia.com.
Ky nen do të zbatohet gjatë kësaj jave, në rast se Gjykata Supreme, ashtu siç bëri PZAP-i, hedh poshtë ankesën e Lëvizjes Vetëvendosje për anulimin e votave me postë të Lidhjes Demokratike të Kosovës dhe organizimin e rivotimit të këtij procesi.
Hedhja poshtë e ankesës së Vetëendosjes, do ta detyronte kryeministrin në detyrë, Albin Kurtin dhe ministrat e tij në detyrë, të cilët janë zgjedhur deputetë, që të paraqesin dorëheqjet e tyre dhe të largohen nga ndërtesat qeveritare.
Ligji për Qeverinë është i qartë dhe nuk lë asnjë mundësi për interpretime të tjera.
Pra, kryeministri në detyrë dhe ministrat e tij në detyrë, që morën votat për t’u bërë deputetë, duhet të dorëzojnë fakte se kanë dhënë dorëheqje, para se të bëhet certifikimi i tyre si deputetë të Kuvendit të ardhshëm të Kosovës.
Aktualisht, kryeministri në detyrë Kurti dhe Lëvizja Vetëvendosje, janë duke shpresuar se Gjykata Supreme do të miratojë kërkesën e tyre
Nëse Gjykata Supreme e Kosovës do të aprovonte ankesën e Lëvizjes Vetëvendosje, partisë së kryeministrit në detyrë, Albin Kurtit, KQZ-së do t’i duheshin edhe dy muaj të tjerë për të përfundar procesin zgjedhor të 9 shkurtit.
Rrjedhimisht, kjo do të shtynte edhe dorëheqjen e kryeministrit në detyrë, Albin Kurti dhe ministrave të tij.
Lëvizja Vetëvendosje është ankuar në PZAP duke kërkuar anulimin e 18,933 votave të ardhura me postë në favor të Lidhjes Demokratike të Kosovës me pretendimin se ato janë të manipuluara. Gjithashtu, LVV ka kërkuar përsëritjen e procesit të votimit me postë dhe largimin e disa kandidatëve të LDK-së nga lista përfundimtare e deputetëve.
Pasi që PZAP-i hodhi poshtë ankesën e partisë së Kurtit, Vetëvendosje më 21 mars 2025 ka dorëzuar ankesën në Gjykatën Supreme të Kosovës. /Demokracia.com/
