Rrjeti i Bizneseve të Diasporës Shqiptare në Botë (RRBDSH) ka lëshuar një njoftim publik duke dënuar veprimet e një grupi individësh që kanë pretenduar të veprojnë në emër të kwsaj organizate. Ky grup individesh ka organizuar një takim në Swiss Diamond Hotel në Prishtinë, duke prezantuar veten si përfaqësues të RRBDSH-së. Organizata sqaron se këta individë nuk kanë asnjë legjitimitet për të vepruar në emër të Rrjetit, pasi nuk kanë qenë pjesë e strukturave të zgjedhura të tij, që nga Kuvendi i fundit i mbajtur në Londër, në vitin 2018.
Në njoftim theksohet se, pavarësisht organizimit të takimit, ky aktivitet nuk ka lidhje me RRBDSH-në. Rrjeti i Bizneseve të Diasporës Shqiptare njofton të gjithë anëtarët dhe publikun e gjerë se asnjë vendim apo deklaratë e nxjerrë nga ky tubim nuk ka asnjë vlefshmëri juridike apo përfaqësim të rrjetit zyrtar.
